Urdu Poetry

 maadaam 

aap bevajah pareshaan-sii kyon hain maadaam 
log kahate hain to phir Thiik hii kahte honge 
mere ehabaab ne tahaziib na siikhii hogii 
mere maahaul men insaan na rahate honge 


nuur-e-saramaayaa se hai ruu-e-tamaddun kii jilaa 
ham jahaaN hain vahaan tahaziib nahiin pal saktii
mufalisii hiss-e-lataafat ko miTaa detii hai 
bhuuk aadaab ke saanche men nahiin dhal saktii 


log kahte hain to logon pe t’ajjub kaisaa 
sach to kahte hain ki naadaaron kii izzat kaisii 
log kahate hain – magar aap abhii tak chup hain 
aap bhii kahiye Gariibon men sharaafat kaisii 


nek maadaam! Bahut jald vo daur aayegaa 
jab hamen ziist ke adavaar parakhne honge 
apanii zillat kii qasam, aap kii azmat kii qasam 
hamako taa’ziim ke meyaar parakhne honge 


ham ne har daur men tazliil sahii hai lekin 
ham ne har daur ke chehare ko ziyaa baKhshii hai 
ham ne har daur me.n mehanat ke sitam jhele hai.n 
ham ne har daur ke haathon ko hinaa baKhshii hai 


lekin is talKh mubaahis se bhalaa kyaa haasil 
log kahate hain to phir Thiik hii kahte honge 
mere ehabaab ne tahaziib na siikhii hogii 
mere maahaul men insaan na rahte honge 


saahir ludhyanvi